Payí̵ Poro Pairimono nánɨ eaŋí̵narɨnɨ.

Payí̵ rɨna Pairimono nánɨ Poro eaŋí̵narɨnɨ. Pairimono ámá aŋí̵ yoí̵ Korosi ŋweáyí̵ worɨnɨ. Amɨpí wí mɨmu'roŋorɨnɨ. Xɨnáínɨŋí̵ nimónɨrɨ wiiarɨgí̵áyí̵ wí enɨ tí̵ŋorɨnɨ. Oyá xɨnáínɨŋí̵ nimónɨrɨ omɨŋí̵ wiiarɨgí̵áyí̵ wo, Onesimasoyɨ rɨnɨŋo re eŋɨnigɨnɨ. Í̵wí̵ nɨwikárɨmɨ e'í̵ nurɨ Romɨyo nɨre'morɨ Poro, e gwí̵ ŋweaŋomɨ nɨwímearɨŋí̵pimɨ dánɨ ámɨ dɨŋí̵ e'móagɨ Poro payí̵ nearɨ Onesimasomɨ nɨwiowárɨrí̵ná Pairimono yokwarɨmí̵ nɨwiirɨ oumímɨnɨrɨ nearɨ wiowárɨŋɨnigɨnɨ.

Philemon

1Poronɨ —Nionɨ Kiraisɨ Jisasomɨ nɨxí̵dɨrɨ yarɨŋápɨ nánɨ gwí̵ aŋí̵yo nɨŋwɨrárɨgí̵onɨrɨnɨ. Nionɨ tí̵nɨ negí̵ nɨrɨxí̵meá Timotio tí̵nɨ payí̵ rɨna nearɨ mónaparɨŋwiɨ. Pairimonoxɨ, yegí̵ dɨŋí̵ sɨxí̵ rɨyigwí̵íoxɨ —Joxɨ yawawi tí̵nɨ nawínɨ Jisasomɨ nɨxí̵dɨrɨ yarɨŋwá nánɨ gwí̵ mónɨŋwá woxɨrɨnɨ. 2Joxɨ tí̵nɨ negí̵ nɨrɨxí̵meáí Apiaí tí̵nɨ Akipaso tí̵nɨ —O none tí̵nɨ negí̵ nawínɨ roarɨŋwá worɨnɨ. O tí̵nɨ Jisasoyá sɨyikí̵ imónɨgí̵á joxɨyá aŋí̵ iwámɨ awí eánarɨgí̵áyí̵ tí̵nɨ ayí̵ ní̵nɨ enɨ aí tí̵nɨ nánɨ payí̵ rɨna nearɨ mónaparɨŋwiɨ. 3“Negí̵ ápo Gorɨxo tí̵nɨ Ámɨná Jisasɨ Kiraiso tí̵nɨ awau' wá seawianɨri seyí̵ne' píránɨŋí̵ nɨwayɨrónɨro ŋweapí̵rɨ nánɨ seaiiri e'í̵isixɨnɨ.” nimónarɨnɨ.

“Joxɨ yarɨŋí̵pɨ nánɨ yayí̵ ninarɨnɨ.” urɨŋí̵ nánɨrɨnɨ.

4Nionɨ negí̵ Gorɨxomɨ xwɨyí̵á rɨrɨmí̵ nɨwirɨ joxɨ nánɨ rɨxɨŋí̵ nɨrurɨyirí̵ná arí̵á re nɨwirɨ nánɨ, “O ámá Gorɨxoyá imónɨgí̵á nɨyonɨ dɨŋí̵ sɨpí nɨwirɨ arɨrá wirɨ Ámɨná Jisasomɨ dɨŋí̵ wɨkwí̵rorɨ yarɨŋorɨnɨ.” Arí̵á e nɨwirɨ nánɨ joxɨ nánɨ rɨxɨŋí̵ nɨrurɨyirí̵ná Gorɨxomɨ yayí̵ wiarɨŋárɨnɨ. 6Joxɨ nene tí̵nɨ nawínɨ Kiraisomɨ dɨŋí̵ wɨkwí̵roarɨŋagwɨ nánɨ nawínɨ ikárɨnɨŋwápimɨ dánɨ “rɨpɨ re oimónɨnɨ.” nimónarɨnɨ, “Amɨpí naŋí̵ Kiraisomɨ nuxí̵dɨrí̵ná epaxí̵ imónɨŋwá nɨpɨnɨ nánɨ xɨxenɨ nɨjí̵á oimónɨnɨ.” nimónarɨnɨ. 7Gí̵ nɨrɨxí̵meáoxɨnɨ, joxɨ ámá Gorɨxoyá imónɨgí̵áyo dɨŋí̵ sɨpí nɨwirɨ nerɨŋí̵pimɨ dánɨ dɨŋí̵ sɨxí̵ umímoŋí̵ eŋagɨ nánɨ nionɨ yayí̵ ayá wí nɨninɨrɨ dɨŋí̵ nií̵á ninarɨnɨ.

Pairimonomɨ Onesimaso nánɨ rɨxɨŋí̵ wurɨyiŋí̵ nánɨrɨnɨ.

8Ayɨnánɨ Poronɨ —Nionɨ rɨxa xweyaŋonɨ nerɨ Kiraisɨ Jisasomɨ nuxí̵dɨrí̵ná yarɨŋápɨ nánɨ gwí̵ ŋweaŋáonɨrɨnɨ. Nionɨ yawawi Kiraiso nánɨ nawínɨ gwí̵ mónɨgwí̵íwawi eŋagɨ nánɨ masɨsí̵á bɨ mɨsí “O e nerí̵náyí̵ naŋí̵ imónɨŋí̵pɨ yarɨnɨ.” yaiwiarɨŋápɨ e e'ɨrɨxɨnɨrɨ sekaxí̵ bɨ rɨrɨpaxí̵ aiwɨ dɨŋí̵ sɨxí̵ yinarɨgwí̵íwawi eŋagɨ nánɨ awayinɨ rɨxɨŋí̵ bɨ orɨrɨmɨnɨ. 10Onesimaso —O nionɨ gwí̵ aŋí̵ tí̵yo nɨŋwearí̵ná wáí̵ urí̵ápimɨ dánɨ Gorɨxomɨ dɨŋí̵ wɨkwí̵roarɨŋí̵ eŋagɨ nánɨ gí̵ íwónɨŋí̵ emeááorɨnɨ. “O nánɨ rɨxɨŋí̵ bɨ owurɨyimɨnɨ.” nimónɨgoɨ. 11Xámɨ “Yí̵wí̵ imónɨŋorí̵anɨ?” wiaiwiago aiwɨ agwɨ joxɨ tí̵nɨ nionɨ tí̵nɨ nɨwawinɨ dɨŋí̵ uŋwɨrárɨpaxí̵ imónɨŋorɨnɨ. 12Agwɨ nionɨ omɨ joxɨ tí̵ŋí̵ e nánɨ nurowárɨrí̵ná gí̵ dɨŋí̵ aí tí̵nɨ nɨxeyánɨrí̵nɨŋí̵ wí̵re'naparɨŋɨnɨ. 13Nionɨ xwɨyí̵á yayí̵ neainarɨŋí̵pɨ wáí̵ urɨmearɨŋáonɨ eŋagɨ nánɨ gwí̵ aŋí̵yo ŋweaŋáná “Onesimaso nionɨ tí̵nɨ nɨŋwearɨ joxɨ nánɨ wayí̵á arɨrá oninɨ.” nɨnimónɨrɨ aiwɨ joxɨ “Ayí̵ ananɨrɨnɨ.” sɨnɨ mɨnɨrɨpa eŋánáyí̵, “E apɨ xe oemɨnɨ.” mɨnimóní̵agɨ nánɨ ámɨ joxɨ tí̵ŋí̵ e nánɨ urowáre'naparɨŋɨnɨ. Joxɨ “Poro sekaxí̵ nɨrí̵í̵pimɨ dánɨ oemɨnɨ.” mɨyaiwí dɨxí̵ dɨŋí̵yo dánɨ “Xe Poro tí̵nɨ nɨŋwearɨ arɨrá owinɨ.” yaiwirí̵a nánɨ omɨ joxɨ tí̵ŋí̵ e nánɨ u'rowáre'naparɨŋɨnɨ. 15Ayí̵ rɨpɨ nánɨ rɨrarɨŋɨnɨ. O ámɨ anɨŋí̵ joxɨyá imónɨní̵a nánɨ bɨ onɨmiápɨ pí̵nɨ nɨrɨwiárɨmɨ nɨbɨrɨ ŋweaŋí̵rí̵anɨ? 16O sɨnɨ dɨxí̵ rɨnáínɨŋí̵ nimónɨrɨ omɨŋí̵ siiarɨŋo aí sɨnɨ axí̵ apɨnɨ mimóní̵ apimɨ nɨmu'rorɨ Jisasomɨ dɨŋí̵ nɨwɨkwí̵rorɨ nánɨ gí̵ nɨrɨxí̵meá dɨŋí̵ sɨxí̵ uyiŋáónɨŋí̵ imónɨŋí̵rɨnɨ. E nimónɨrɨ aiwɨ joxɨ aŋɨpaxí̵ “Rɨxa gí̵ nɨrɨxí̵meáónɨŋí̵ imónɨŋí̵ worí̵anɨ?” wiaiwipaxorɨnɨ. 17Ayɨnánɨ “Poro nionɨ tí̵nɨ nawínɨ gwí̵ mónɨgwí̵íorí̵anɨ?” nɨniaiwirí̵náyí̵, Onesimaso símeááná nionɨ nɨmímɨnɨmɨnɨrɨ eŋí̵pa omɨ enɨ axí̵pɨ umímɨní̵ɨrɨxɨnɨ. 18E nɨrɨrɨrɨ aí o pí̵nɨ nɨrɨwiárɨmɨ nurí̵ná sɨpí nɨsikárɨmɨ uŋí̵pɨranɨ, amɨpí í̵wí̵ rɨrápɨŋí̵pɨranɨ, ananɨ nionɨ rɨyɨpárómí̵árɨnɨ. 19Poronɨ niɨwanɨŋonɨ gí̵ we' tí̵nɨ rí̵wamɨŋí̵ rɨpɨ “Nionɨ rɨyɨpárómí̵árɨnɨ.” nɨrɨrɨ eaarɨŋɨnɨ. Ayí̵ joxɨ enɨ maŋí̵ nionɨyáyo dánɨ rarí̵ná Jisasomɨ dɨŋí̵ wɨkwí̵róagɨ nánɨ joxɨ nionɨ enɨ nɨyɨpáropaxí̵ imónɨŋí̵pɨ nánɨ mɨrɨrɨpa e'ɨmɨgɨnɨ. 20Gí̵ nɨrɨxí̵meáoxɨnɨ, Ámɨná Kiraiso tí̵nɨ nawínɨ ikárɨnɨgwí̵íoxɨ eŋagɨ nánɨ nionɨ rɨxɨŋí̵ rɨrí̵ápɨ xɨxenɨ niíɨrɨxɨnɨ. E nerí̵náyí̵, apɨnɨ me' dɨŋí̵ sɨxí̵ enɨ nɨmímorí̵árɨnɨ.

21“Arí̵á yí̵mɨgí̵ ninɨŋoɨ.” nɨsiaiwirɨ dɨŋí̵ sí̵ŋá neánarɨŋagɨ nánɨ re nɨnimónɨrɨ payí̵ eaarɨŋɨnɨ, “Joxɨ nionɨ rɨrí̵ápɨnɨ me' apɨ nɨmu'rorɨ ámɨ seáyɨ e imónɨŋí̵ bɨ tí̵nɨ erí̵árɨnɨ.” nɨnimónɨrɨ payí̵ rɨna eaarɨŋɨnɨ. 22Rɨxɨŋí̵ ámɨ bɨ rɨpɨ orɨrɨmɨnɨ, “Aŋí̵ awawá nionɨ wepaxí̵ imónɨŋí̵wá óí̵ nimoáríɨrɨxɨnɨ.” orɨrɨmɨnɨ. Ayí̵ rɨpɨ nánɨ rɨrarɨŋɨnɨ. Seyí̵ne' Gorɨxomɨ rɨxɨŋí̵ nurɨyarɨgí̵ápimɨ dánɨ oyá dɨŋí̵ tí̵nɨ gwí̵ aŋí̵yo dánɨ nɨwáráná seyí̵ne' tí̵ámɨnɨ bí̵ɨmɨgɨnɨrɨ dɨŋí̵ nikwí̵morɨ nánɨ rarɨŋɨnɨ.

Yayí̵ nɨwiowárɨrí̵ná urɨŋí̵pɨ nánɨrɨnɨ.

23Epapɨraso —O enɨ Kiraisɨ Jisasomɨ uxí̵darɨŋí̵ wo eŋagɨ nánɨ nionɨ tí̵nɨ nawínɨ gwí̵ ŋweagwí̵íorɨnɨ. O joxɨ nánɨ yayí̵ siowáre'naparɨnɨ. 24Mako tí̵nɨ Arisɨtakaso tí̵nɨ Dimaso tí̵nɨ Ruko tí̵nɨ —Awa Jisasomɨ nɨxí̵dɨro yarɨŋagí̵a nánɨ gwí̵ nɨmónɨgí̵áwarɨnɨ. Awa enɨ yayí̵ siowáre'naparɨŋoɨ. 25“Ámɨná Jisasɨ Kiraiso anɨŋí̵ wá nɨseawiaga u'wɨnɨgɨnɨ.” nimónarɨnɨ.